UFC президенти Дана Уайт шу йил июнь ойида Оқ уйда ўтказилиши режалаштирилаётган UFC турнири учун барча режалар деярли тайёр эканини маълум қилди. Бу ҳақда у IFL TV телеканалига берган интервьюсида сўз очди.
“Мен бу ҳафта бутун жанг картасини эълон қиламан. Ҳаммаси тайёр. Карта аллақачон шакллантирилган”, дейди Дана Уайт.
2025 йил 4 июль куни АҚШ Президенти Дональд Трамп АҚШнинг 250 йиллигини нишонлаш доирасида 2026 йил 14 июнда Оқ уй ҳудудида UFC тадбири ўтказилишини эълон қилган. Тадбирда саккиздан тўққизтагача чемпионлик жанглари бўлиб ўтиши кутилмоқда.
Икки вазн тоифасида собиқ UFC чемпиони Жон Жонс Оқ уйдаги тадбирда иштирок этиш масаласида промоушен раҳбарияти билан музокаралар олиб бораётганини тан олган.
Шунингдек, Конор Макгрегор ҳам UFC билан навбатдаги жангини муҳокама қилаётганини маълум қилганди. Ирландиялик жангчининг сўзларига кўра, унинг кейинги жанги айнан Оқ уйдаги тадбир доирасида ўтказилиши мумкин.
