Буюк Британия иммиграция тизимини тўлиқ рақамлаштириб, жисмоний иммиграция ҳужжатлари ўрнига E-Visa тизимини жорий этди. Эндиликда мамлакатга кириш ёки унда қолиш ҳуқуқини тасдиқловчи маълумотлар рақамли шаклда сақланади. Бу ҳақда мамлакат ҳукумати сайтида маълум қилинди.
Буюк Британия ҳукуматига кўра, эелектрон виза иммиграция мақомини тасдиқлашни соддалаштиради ҳамда ҳужжатларнинг йўқолиши, ўғирланиши ёки қалбакилаштирилишининг олдини олади. Шунингдек, ариза маъқуллангач, жисмоний иммиграция ҳужжатини кутиш ёки олиб кетишга ҳожат қолмайди. Зарурат туғилганда эса биометрик маълумотларни шахсан топшириш талаб этилиши мумкин.
Муваффақиятли виза олган шахслар Буюк Британияга сафар қилишдан аввал ўзларининг Буюк Британия Виза ва иммиграция бошқармасининг шахсий онлайн кабинетига кириб, E-Visa’сини ва иммиграция рухсатини текшириши керак бўлади.
Қайд этилишича, 2026 йил 1 июлдан бошлаб Буюк Британия янги виза олувчиларга паспортга ёпиштириладиган visa vignette (виза стикери) беришни ҳам тўхтатган. Эндиликда янги ариза топширувчиларга фақат электрон виза расмийлаштирилади.
Шунингдек, агар ариза топширувчи паспортини Виза ариза марказига топширган бўлса, у ариза кўриб чиқилиши давомида эгасига қайтарилади. Виза маъқулланган тақдирда эса сафар қилишдан олдин E-Visa Буюк Британия Виза ва иммиграция бошқармаси ҳисобида кўриниши лозим.
