Кариб ҳавзаси ва Африка мамлакатлари Буюк Британиядан қуллик учун товон талаб қиляпти. Бу ҳақда “Reuters” хабар берди.
Нашр маълумотига кўра, Кариб ҳамжамияти (CARICOM) таркибидаги давлатларнинг репарациялар бўйича комиссияси делегацияси Буюк Британия расмийлари ва сиёсатчилари билан учрашиб, қуллик ва мустамлакачиликнинг тарихий адолатсизлиги ҳамда унинг узоқ муддатли оқибатларини бартараф этиш масалаларини муҳокама қилади.
CARICOM’га аъзо 15 давлат тақдим этмоқчи бўлган репарация режаси “тўлиқ ва расмий узр сўраш, таълим дастурларини кенгайтириш, қарзларни бекор қилиш ҳамда молиявий компенсация” каби талабларни ўз ичига олади.
Шу каби режа Африка иттифоқига аъзо давлатлар томонидан ҳам ишлаб чиқилмоқда. Бу мамлакатлар Европанинг ХV-XIX асрлардаги қуллар савдоси учун компенсация талаб қиляпти. Маълумотларга кўра, ўша даврда 12,5 миллиондан ортиқ африкалик қулга айлантирилган.
Нашрнинг ёзишича, дунёда репарация талабларига нисбатан салбий муносабат кучайиб бормоқда. Кўплаб Европа етакчилари эса замонавий давлатлар тарихий хатолар учун жавобгар бўлолмаслигини айтиб, бу мавзуни муҳокама қилишга қарши чиқмоқда.
“The Repair Campaign” буюртмаси асосида ўтказилган 2025 йилги сўров натижаларига кўра, Буюк Британияда респондентларнинг 85 фоизи мамлакат Кариб ҳавзаси давлатларига уч миллиондан ортиқ африкаликни мажбуран кўчирганини билмаган.
