Мадриднинг “Реал” клуби ҳамда бразилиялик футболчи Винисиус Жуниор янги шартнома имзолаши мумкин. АS нашрининг ёзишича, клуб ҳам, футболчи ҳам ҳамкорликни давом эттиришни истайди. Мадридликлар 25 ёшли ҳужумчини жамоанинг келажаги сифатида кўрмоқда. Шу боис томонлар янги битим имзолаш учун яна музокара бошлади.
Манбага кўра, Клублар ўртасидаги Жаҳон чемпионатидан кейин юзага келган айрим келишмовчиликлар ҳафта охиригача ҳал қилинади. Бу эса спорт жиҳатидан ҳам, клуб имижи ва иқтисодий томондан ҳам фойда келтириши таъкидланмоқда. Янги битимнинг аниқ молиявий шартлари ошкор қилинмаган, аммо футболчи йилига соф 17 миллион евро маош олиши тахмин қилинмоқда. Шунингдек, унинг клубдаги мавқеи ҳам ошиши белгиланган.
Аввалроқ “Реал” футболчи билан хайрлашишга тайёрлиги ҳамда 150 миллион евро эвазига трансфер қилиши мумкинлиги айтилганди. Шунингдек, унга “Манчестер Сити” жиддий қизиқиш билдираётгани ҳақида хабарлар тарқалганди
Маълумот учун, Винисиус 2018-йилдан бери “Реал” сафида ўйнаб келади ва шу вақт давомида 338 та ўйинда иштирок этиб, ўз ҳисобига 111 та гол ҳамда 87 та голли узатма ёздириб қўйган. Transfermarkt портали футболчининг қийматини 150 миллион еврога баҳоламоқда.
