Бруно Фернандеш яна трансфер бозоридаги асосий муҳокама мавзусига айланди. Хабарларга кўра, “Манчестер Юнайтед” сардори келаси ёзги трансфер ойнаси олдидан “Реал Мадрид” раҳбарияти томонидан эҳтимолий вариантлардан бири сифатида кўрилмоқда.
Мадрид клуби марказий позиция учун етакчилик хусусиятига эга футболчи изламоқда. Шу нуқтайи назардан, тажрибали португалиялик ярим ҳимоячи “Қироллик клуби” талабларига мос келадиган номзод сифатида баҳоланмоқда.
Манбаларга кўра, “Манчестер Юнайтед” Фернандеш бўйича тахминан 60 миллион евролик таклиф тушса, музокараларга очиқ бўлиши мумкин. Ушбу сумма “Реал Мадрид”нинг трансфер сиёсатига мос келади ва футболчининг тажрибасини инобатга олган ҳолда мақбул баҳо сифатида қаралмоқда.
“Реал” раҳбарияти Фернандешнинг ижодкорлиги, пас бериш услуби, узоқ масофадан зарбалари ҳамда турли тактик схемаларга мослаша олиш қобилиятини юқори баҳоламоқда. У ҳужумкор ярим ҳимоячи сифатида ҳам, марказда ёки орқа позицияларда ҳам самарали ўйнай олади.
Бироқ футболчи 31 ёшда. Сўнгги йилларда қаймоқранглилар асосан ёш ва келажакда қайта сотиш имкониятига эга футболчиларга эътибор бериб келмоқда. Шунга қарамай, раҳбарият тажрибали ўйинчининг ёш футболчилар учун муҳим таянч бўлишини ҳам инкор этмаяпти.
Ҳозирча Бруно Фернандеш “Реал Мадрид” учун реал вариант бўлиб қолмоқда, бироқ у асосий устувор номзод эмас. Клуб яна бир нечта альтернативаларни ўрганмоқда ва якуний қарор трансфер бозоридаги вазият ҳамда “Манчестер Юнайтед”нинг позициясига боғлиқ бўлади.
Фернандеш жорий мавсум “Манчестер Юнайтед” сафида барча мусобақалар доирасида 18 ўйинда майдонга тушиб, 5 та гол ва 7 та голли узатма муаллифига айланган. Transfermarkt портали футболчининг трансфер нархини 40 миллион еврога баҳолаган.
