Европа Иттифоқи Украина президенти Владимир Зеленский томонидан илгари сурилган ягона Европа армияси ташаббусига қарши чиқди. Бу ҳақда ЕИ дипломатияси раҳбари Кая Каллас Озодлик радиосига берган изоҳида маълум қилди.
Калласнинг таъкидлашича, янги ҳарбий тузилма НАТОга параллел функция бажариб, трансатлантик альянснинг фаолиятига салбий таъсир кўрсатади. Қолаверса, миллий армиялар жанговар салоҳиятини тушириб юборади. Унинг фикрича, ҳарбий соҳада энг муҳим омил аниқ тузилма ва қатъий иэрархиядир.
“Европадаги ҳар бир давлатнинг ўз қуролли кучи бор. Улардан 23 таси НАТО тузилмасига ҳам киради. Шунинг учун алоҳида Европа армияси яратилишини тасаввур қила олмайман. Амалда мавжуд бўлган армиялар билан ишлашимиз керак”, деган Каллас.
Унинг сўзларига кўра, мустақил Европа армиясининг пайдо бўлиши буйруқ бериш тизимида чалкашлик келтириб чиқаради.
“Агар фавқулодда вазият юз берса, ким кимга буйруқ бераётгани аниқ бўлиши керак. Оғир шароитларда буйруқлар бажарилмай, шунчаки ҳавога сингиб кетиши мумкин”, дея қўшича қилган ЕИ мулозими.
Зеленскийнинг таклифи
Украина президенти иттифоқчиларига мурожаат қилиб, 3 миллион ҳарбий хизматчидан иборат Европа қуролли кучларини тузиш ғоясини илгари сурди. Унинг таъкидлашича, мазкур ташаббус НАТО ёки АҚШга рақобат эмас, балки қитъанинг мудофаа салоҳиятини мустаҳкамлашга қаратилган стратегик заруратдир. У, шунингдек, Украина қуролли кучларида янги тузилма таянчи бўлиш учун етарли тажриба борлигини қўшимча қилган.
Politico нашрининг ёзишича, Кая Калласнинг баёнотига қарамай Европа етакчилари аллақачон янги ҳарбий иттифоқ тузиш ҳақида муҳокамалар олиб боряпти. Украина ушбу тузилмада муҳим ўрин эгаллаши мумкин. Бироқ нашр молиялаштириш ва ягона қўмондонлик тизими каби омиллар асосий муаммо бўлиб турганини таъкидлаган.
