Курдлар етакчилигидаги Сурия демократик кучлари (SDF) Аҳмад аш-Шаръа ҳукумати билан босқичма-босқич интеграция бўйича кенг қамровли келишувга эришди. SDF томонидан эълон қилинган баёнотга кўра, курдлар армия сафига қўшилади. Битимни Сурия давлат телевидениеси ҳам тасдиқлади.
Келишув ҳукумат кучлари ва SDF ўртасида бир неча ҳафта давом этган жанглардан сўнг имзоланди. Тўқнашув натижасида курдлар мамлакат шимоли ва шимоли-шарқидаги ҳудудларнинг катта қисмини бой берди. Шундан сўнг АҚШ воситачилигида ўт очишни тўхтатиш режими жорий этилганди.
Битимга кўра, томонлар ўз кучларини фронт чизиқларидан олиб чиқади. Ҳукумат Ҳасака ва Қамишли шаҳарлари марказларига қўшин киритади. Маҳаллий хавфсизлик тузилмалари эса давлатга интеграция қилинади. Шунингдек, Сурия армияси таркибида курдлардан иборат алоҳида дивизия тузилади. Кобани шаҳрида жойлашган яна бир SDF бригадаси ҳам давлат назоратига ўтади.
Келишув доирасида нафақат ҳарбий тузилмалар, балки курдлар назоратидаги фуқаролик институтлари ҳам босқичма-босқич давлат тузилмалари билан интеграция қилинади. Сурия ҳукумати вакилларига кўра, ҳужжат имзоланганидан бошлаб кучга киради.
Мазкур келишув муваққат президент Аҳмад аш-Шаръа учун муҳим сиёсий ютуқ сифатида кўриляпти. Боиси у 14 йиллик фуқаролар урушида вайрон бўлган мамлакатни оёққа қўйиб, ҳудудий яхлитлигини тиклаш учун ҳаракат қиляпти. Дамашқ ва SDF интеграция бўйича илк келишув 2025 йил мартида имзолаган эди. Бироқ у амалда ижро этилмагани боис қуролли низо келиб чиқди.
Қўшма Штатларнинг махсус вакили Том Баррак мазкур келишувни “тарихий бурилиш” деб атаб, битим барча томонларнинг манфаатларини ҳисобга олганини таъкидлади. АҚШ президенти Дональд Трамп ҳам Суриядаги сўнгги ўзгаришлардан мамнун эканини билдирди. Унинг фикрича, Аҳмад аш-Шаръа Суриянинг ҳудудий яхлитлигини тиклаш ва давлат институтларини мустаҳкамлаш йўлида жиддий ютуқларга эришган.
