Бухоро вилояти Ромитан туманида ЙПХ инспекторининг ноқонуний хатти-ҳаракати акс этган ҳолат бўйича хизмат текшируви тайинланди. Бу ҳақда вилоят Йўл ҳаракати хавфсизлиги бошқармаси маълум қилди.
Маълум қилинишича, 18 ноябрь куни маъмурий амалиёт маркази инспектори, кичик сержант Сайфиев хизмат автомашинаси — Nexia-2 да ҳаракатланиб келиб, светофорнинг қизил ишорасида тўхтаб турган Equinox ҳайдовчисидан йўл беришни сўраб, автомобиль чироқларини қайта-қайта ўчириб-ёққан.
Шунингдек, инспектор ҳайдовчининг олдига ўтиб, унга асоссиз равишда “авария содир этдингиз” деб айб қўйган ва бодикамерасиз ҳолда автомобилни йўл четига олишни талаб қилган.
Ушбу ҳолат юзасидан кичик сержант Сайфиевга нисбатан хизмат текшируви бошланган. Текширув якунига кўра, воқеага тегишли қонуний баҳо берилиши билдирилди.
