Бугун, 11 июнь куни тонгда Хитойнинг Гуанси-Чжуан автоном райони Синъань туманида юз берган портлаш оқибатида 7 киши ҳалок бўлди, яна 17 киши жароҳатланди. Бу ҳақда “China Daily” хабар берди.
Маълумотларга кўра, портлаш маҳаллий вақт билан соат 01:40 да Синъань туманидаги Линсян йўлида содир бўлган.
Ҳодисадан сўнг Гуйлин шаҳри ва Синъань тумани раҳбарлари воқеа жойига зудлик билан етиб келиб, полиция, ёнғин хавфсизлиги, соғлиқни сақлаш ҳамда фавқулодда вазиятлар хизматлари билан биргаликда қутқарув ишларини ташкил этган.
Қутқарувчилар ҳодиса жойида тўрт марта батафсил қидирув ишларини олиб борган. Жароҳатланган 17 кишининг барчаси шифохонага ётқизилган бўлиб, уларнинг аҳволи барқарор экани, ҳаёти учун хавф йўқлиги маълум қилинган.
Айни пайтда воқеа жойида қутқарув ишлари давом этмоқда.
Дастлабки тергов натижаларига кўра, портлашга газ қувуридаги сизиб чиқиш сабаб бўлмагани аниқланган.
Ҳуқуқ-тартибот органлари портлашнинг аниқ сабабларини аниқлаш бўйича терговни давом эттирмоқда.
