Жанубий Корея президенти Ли Же Мёнг 1 ноябрь куни Хитой раҳбари Си Цзиньпин билан учрашиб, ядровий қуролга эга қўшниси — Шимолий Корея билан музокараларни қайта бошлашда Пекиннинг ёрдамини сўради. Бу ҳақда Yonhap News Agency хабар берди.
Учрашув Жанубий Кореянинг Гёнжу шаҳрида бўлиб ўтган Осиё-Тинч океани иқтисодий ҳамкорлик (APEC) саммити доирасида ўтказилган. Си Цзиньпин АҚШнинг минтақадаги иттифоқчиси — Жанубий Кореяга 11 йилдан кейин илк бор ташриф буюрган. Саммитдан сўнг Ли Же Мёнг уни расмий кечки овқатда меҳмон қилган.
Хитой раҳбари учрашув чоғида Пекин Сеул билан ҳамкорликни кенгайтиришга ва минтақадаги муаммоларни биргаликда ҳал этишга тайёр эканини билдирган.
“Хитой Жанубий Кореяни ажралмас ҳамкор деб билади”, деган Цзиньпин.
Муддатдан аввал ўтказилган сайловда президент этиб сайланган Ли Же Мёнг АҚШ билан алоқаларни мустаҳкамлаш, шу билан бирга Хитой билан кескинликни оширмаслик ва Шимол билан тарангликни камайтиришни ваъда қилиб келмоқда. Лига кўра, ҳозир КХДР билан мулоқот учун қулай шароит шаклланмоқда.
“Умид қиламанки, Жанубий Корея ва Хитой стратегик алоқаларни кучайтириб, бу имкониятлардан фойдаланади ва Шимол билан мулоқотни тиклашга ҳисса қўшади. Минтақавий хавфсизлик муҳимлигига ортиқча урғу беришнинг ҳожати йўқ”, деган Ли.
Си Цзиньпин Жанубий Корея президентининг фикрларига жавобан шундай деган:
“Хитой Жанубий Корея билан мулоқотни чуқурлаштиришга, икки томонлама стратегик ҳамкорликни барқарор ривожлантиришга ва минтақавий тинчлик ҳамда тараққиётга ҳисса қўшишга тайёр”.
Жанубий Корея раҳбари Шимолни денуклеаризация қилишни босқичма-босқич амалга оширишни таклиф қилмоқда — аввал мулоқотни йўлга қўйиш, сўнгра янги ядровий дастурларни музлатиш орқали. Аммо Пхеньян бу ғояни “амалга ошмайдиган орзу” деб рад этади.
