Қўшма Штатлар яқин кунларда Венесуэлага қарши амалиётларнинг янги босқичини, жумладан, Президент Николас Мадурони ағдариш эҳтимолини ҳам бошлашга тайёрланмоқда. Бу ҳақда “Reuters” агентлигига анонимлик шарти билан АҚШ расмийлари маълум қилди.
“АҚШ яқин кунларда Венесуэла билан боғлиқ операцияларнинг янги босқичини бошлашга тайёрланмоқда”, дейилади нашр хабарида.
Агентлик манбаларига кўра, АҚШнинг Мадурога қарши яширин амалиётлари, жумладан, Венесуэла раҳбарини ағдаришга уриниш эҳтимоли бор.
“АҚШ Президенти Дональд Трамп мамлакатимизга гиёҳванд моддалар оқимини тўхтатиш ва айбдорларни жавобгарликка тортиш учун Америка кучининг барча воситаларидан фойдаланишга тайёр”, деган расмийлардан бири.
Бўлажак операцияларнинг аниқ вақти ва кўлами номаълумлигича қолмоқда. Шунингдек, Трамп ҳаракат қилиш тўғрисида якуний қарор қабул қилгани ҳақида ҳам маълумот йўқ.
Охирги икки ой ичида АҚШ Кариб денгизида гиёҳванд моддалар олиб кетаётгани айтилаётган қайиқларни йўқ қилиш учун бир неча бор ҳарбий кучлардан фойдаланган. Расмийларга кўра, бундай операциялар трансмиллий жиноятчилик ва гиёҳванд моддалар савдосига қарши кураш мақсадида олиб борилмоқда.
Бу Каракас ва Вашингтон ўртасидаги муносабатларни сезиларли даражада таранглаштирди. Оқ уй Марказий разведка бошқармасига Мадуро ҳукуматини беқарорлаштириш мақсадида мамлакатда яширин операциялар ўтказишга рухсат берди. АҚШнинг фикрича, Венесуэла Президенти АҚШга наркотик моддаларни олиб ўтишда террорчи ташкилотлардан фойдаланмоқда.
