2025 йил октябрь ойида ломбардлар таклиф қилган йиллик ўртача кредит ставкаси 96,5 фоизни ташкил этди. Бунда нарх сентябрь ойидагига нисбатан 0,7 фоизга пасайган.
Марказий банк таҳлилига кўра, Ўзбекистонда ломбардлар томонидан ажратилаётган микроқарзларнинг энг паст фоиз ставкаси 60 фоиздан бошланади. Қарзнинг юқори қиймати эса 109,5 фоизгача етади. Октябрда республикадаги ломбардларнинг учдан бир қисми кредитларни 100 фоиздан юқори қийматда берган.
Маълумот учун, ломбард — гаровга қўйилган муайян буюмлар эвазига маълум муддатга фоизли қарз берувчи муассаса. Ўзбекистонда жорий йил III чораги якуни бўйича жами 92 та ломбард фаолият юритяпти. Уларда 126 та филиал мавжуд. Энг кўп ломбардлар Тошкент шаҳрида жойлашган — 47 та.
Марказий банк январь-сентябрь ойларида ломбардлар 2,1 триллион сўм кредит берганини маълум қилган. Қарз олувчиларнинг 96 фоизи жисмоний шахслар бўлган.
