АҚШ ҳукумати бутун дунё бўйлаб виза учун суҳбатларни вақтинча тўхтатди. Президент Дональд Трамп администрацияси Оқ уйга қайтганидан сўнг миграцияга қарши қатъий чоралар кўрмоқда. Бу ҳақда Reuters хабар берди.
Қўшма Штатлар Давлат департаменти вакилининг 25 август куни маълум қилишича, дунёдаги барча АҚШ элчихоналари ва консулликларида глобал тренинг бошланган. Трейнинглар ўтказилиши сабабли виза хизматлари учун белгиланган учрашувлар вақти ўзгартирилади.
Трамп мамлакат ичидаги хавфсизликни яхшилаш мақсадида ноқонуний мигрантларни депортация қилиш ва иммиграция назоратини кучайтириш сиёсатини олиб бормоқда. Ушбу чоралар доирасида сиёсий қарашлар ҳамда АҚШнинг иттифоқчиси бўлмиш Исроилнинг Ғазога ҳужумларига қарши намойишларда қатнашиш каби қатор сабаблар билан визалар ҳамда грин карталар бекор қилинмоқда, аризалар рад этилмоқда.
Бироқ бу қатъий сиёсат судларда эътирозларга учрамоқда. Ўтган ҳафтада АҚШ суди Трамп администрациясининг 75 та давлат фуқароларига иммигрантлик визаларини беришни тўхтатиш ҳақидаги қарорини бекор қилди. Судья бу сиёсат давлат котиби Марко Рубионинг қонуний ваколатлари доирасидан чиқиб кетганини таъкидлади.
Давлат департаменти ўтказилаётган тренинг тафсилотлари ва унинг қанча давом этиши ҳақида аниқ маълумот бермади. Идорага кўра, бу машғулотлар консуллик ходимларига АҚШ давлат нафақаларига қарам бўлиб қолиши мумкин бўлган номзодларни аниқлашга ҳамда визаларни ҳар томонлама ва бир хил баҳолашга ёрдам беради.
Виза учрашувларининг тўхтатилгани ҳақида биринчи бўлиб Financial Times нашри хабар берганди. Манбага кўра, АҚШ элчихоналари ва консулликларида суҳбат куни белгиланган иммигрантлик визаси номзодларига хатлар юборилган. Унда учрашувлар кўчирилгани ва янги сана ҳақида кейинроқ хабар берилиши айтилган.
Инсон ҳуқуқлари ташкилотлари Трампнинг ушбу сиёсатини кескин қораламоқда. Улар бу чораларни камситувчи ҳамда сўз эркинлиги ва адолатли суд ҳуқуқларини бузувчи деб ҳисоблайди. Шунингдек, ҳуқуқ ҳимоячилари бундай чоралар АҚШда, айниқса ирқий камситишдан хавотирда бўлган миллий озчиликлар учун хавфли муҳит яратганини таъкидламоқда.
Трамп 2024-йилги сайлов кампаниясида ноқонуний иммиграцияни тўхтатишга ваъда берганди. Бироқ унинг администрацияси қонуний иммиграцияни ҳам қийинлаштирмоқда. Масалан, ишчи визаларининг айрим турлари учун номзодларга янги ва қиммат тўловлар жорий этилди.
