Эрон билан кескинлик кучайиб бораётган бир пайтда, Иорданиядаги АҚШ ҳарбий самолётлари сони кескин ошди. Бу ҳақда сунъий йўлдош тасвирлари ва парвоз маълумотларига таяниб, “The New York Times” хабар берди.
Маълумотларга кўра, АҚШ авиация гуруҳининг жойлаштирилиши Муваффақ Салти ҳарбий базасида қайд этилган.
“Иордания марказидаги база АҚШ ҳарбийлари томонидан Эронга эҳтимолий зарбаларни режалаштиришнинг асосий марказига айланди”, дейилади нашр хабарида.
Сунъий йўлдош тасвирларида 60 дан ортиқ самолётни кўриш мумкин. Бу кўрсаткич ушбу объектдаги одатий мавжудликдан деярли уч баравар кўп.
Бундан ташқари, парвозларни кузатиш маълумотлари таҳлили шуни кўрсатадики, 15 февралдан бери базага камида 68 та транспорт самолёти қўнган.
Мақолада қўшимча қирувчи самолётларнинг баъзилари бошпаналарда яширинган бўлиши мумкин деб тахмин қилинмоқда. Суратларда, шунингдек, замонавий F-35 қирувчи самолётлари, бир нечта учувчисиз учиш аппаратлари, вертолётлар ва янги ҳаво мудофааси тизимлари кўрсатилган.
Иордания расмийлари эса ускуналарни жойлаштириш Вашингтон билан икки томонлама мудофаа келишуви доирасида амалга оширилаётганини билдирган.
