АҚШ президенти Дональд Трамп Нью-Йорк шаҳрининг янги сайланган мэри Зохран Мамданининг илк чиқишини танқид қилди. Бу ҳақда у Fox News телеканалига берган интервьюсида маълум қилди.
Трампнинг сўзларига кўра, Демократик партия номзоди бўлган Мамданининг сайлов натижалари эълон қилингандан кейинги нутқи «жуда ғазабнок бўлган».
«Унинг жаҳлланиши, албатта менга нисбатан эди. Менимча, у анча мулойимроқ бўлиши керак. Ахир мен тасдиқлайдиган кўп нарса унга ҳам тегишли. Шу жиҳатдан, у фаолиятини ёмон бошлади», – деди Трамп.
Президент Мамданини Вашингтонга ҳурмат билан муносабатда бўлишга чақирди.
«Агар у ҳурматсизлик кўрсатса, унда муваффақиятга эришиш имконияти бўлмайди. Мен эса унинг муваффақият қозонишини хоҳлайман – шахсан унинг эмас, балки шаҳарнинг манфаати учун. Мен Нью-Йоркни яхши кўраман ва бу шаҳар гуллаб-яшнаши учун унинг янги мэрига омад тилайман», – деди АҚШ раҳбари.
CBS News маълумотига кўра, шаҳар мэрлигига бўлиб ўтган сайловда 2 миллиондан ортиқ инсон иштирок этган – бу 1969 йилдан бери энг юқори кўрсаткич.
34 ёшли Зохран Мамдани – ўтган асрдаги илк мусулмон ва энг ёш шахс сифатида Нью-Йорк шаҳарининг раҳбари бўлди. У угандалик муҳожирлар оиласида туғилган.
