АҚШ президенти Дональд Трамп Венесуэла қирғоқларига 16 минг ҳарбийдан иборат гуруҳни юборди. Бу ҳақда The Washington Post хабар берди.
Нашр маълумотига кўра, кучлар таркибига саккизта жанговар кема, битта атом сувости кемаси, авиация, жумладан B-52 стратегик бомбардимончиси ва F-35 қирувчи самолётлари киради. Шунингдек, Gerald R. Ford номли авиаташувчи бешта кема билан бирга Кариб денгизига йўл олган.
АҚШнинг минтақадаги ҳарбий мавжудлигини кескин ошириши Трамп маъмуриятининг бу ҳудудда операцияларни кенгайтиришга тайёргарлик кўраётганидан дарак беради. Бу эса Венесуэла билан кескинликни янада кучайтириб, АҚШ томонидан илк зарба берилиши эҳтимолини ошириши мумкин.
Оқ уй 24 октябрь куни Gerald R. Ford бошчилигидаги зарба берувчи гуруҳ жойлаштирилишини эълон қилди. Маъмурият бу қадамни гиёҳванд моддалар савдосига қарши операцияларни кучайтириш зарурати билан изоҳлади. Ўша куни Вашингтон Колумбия президенти Густаво Петрога нисбатан санксиялар жорий этди.
The Wall Street Journal ва The New York Post манбаларига кўра, АҚШ маъмурияти наркотрафикка қарши операциялар доирасида Венесуэла ҳудудидаги ҳарбий объектларга эҳтимолий зарбаларни ма’қуллаган ва Пентагон тез орада амалий ҳаракатларни бошлаши мумкин. Бироқ Дональд Трампнинг ўзи бу хабарларни рад этиб, уларни “ҳақиқатга тўғри келмайди” деб атаган.
The Washington Post қўлга киритган АҚШ ҳукумати ички ҳужжатларида айтилишича, Венесуэла президенти Николас Мадуро Россиядан ҳарбий ёрдам сўраган. У Москвадан 14 та зенит-ракета мажмуасини етказиб беришни, бир нечта Su-30МК2 қирувчи самолётларини таъмирлаш ва тиклашни, саккизта двигателнинг капитал таъмирини, бешта радарни таъмирлашни ҳамда логистик ёрдамни сўраган. Шунингдек, Хитой ва Эронга ҳам мурожаат қилиб, “ҳарбий ҳамкорликни кенгайтириш”, разведка воситалари, GPS сигналини тўсувчи қурилмалар ҳамда узоқ масофали дронлар етказиб беришни сўрагани айтилмоқда.
