Хитой энг ёш астронавти ва тўртта қора сичқонни “Tiangong” космик станциясига юборди. Улар 31 октябрь куни “Shenchjou-21” космик кемасида Jiuquan космодромидан учирилди. Бу ҳақда CNN хабар берди.
Экипажнинг уч нафар аъзоси 1 ноябрь тонгида Хитой космик станциясига етиб борган. Улар аввалги экипаж аъзолари билан учрашган ва орбитадаги янги ротация босқичини бошлаган.
“Shenchjou-21” миссияси олти ой давом этади. Дастурда илк бор 39 ёшли Чжан Хунжан ҳамда 32 ёшли Ву Фей — Хитой тарихидаги энг ёш астронавт — иштирок этмоқда. Миссияга 48 ёшли Чжан Люн қўмондонлик қилмоқда. У 2022 йилда “Shenchjou-15” миссияси таркибида парвоз қилган эди.
- Космик станциядаги биринчи кичик сутемизувчилар
Астронавтлар олти ойдан ортиқ муддат “Tiangong”да яшаган ва ишлаган “Shenchjou-20” экипажидан вазифани қабул қилиб олди. “Shenchjou-20” космонавтлари яқин кунларда Ерга қайтади.
Бу сафар “Shenchjou-21” экипажига тўртта қора сичқон ҳам ҳамроҳ бўлди. Улар Хитой космик станциясига олиб чиқилган биринчи кичик сутемизувчилар ҳисобланади. Сичқонлар паст орбитада кўпайиш жараёнларини ўрганиш бўйича тажрибаларда ишлатилади. Ярим йиллик парвозлар эса “Shenchjou” дастури учун одатий ҳолга айланган.
- Хитой ва АҚШ ўртасидаги космик рақобат
Хитойнинг юқори суръатдаги космик ютуқлари Вашингтонда хавотир уйғотмоқда. АҚШ ҳозирда Хитойдан олдин Ойга астронавт юборишни мақсад қилган. Ҳар икки давлат янги космик дастурларни ривожлантиришда ҳам рақобат қилмоқда: АҚШ Ой тадқиқотлари учун Artemis дастурига, Хитой ва Россия эса Халқаро Ой тадқиқот станцияси лойиҳасига раҳбарлик қилмоқда.
