OpenAI компанияси ўз хизматларидан фойдаланиш сиёсатини янгилади. Эндиликда ChatGPT орқали ҳуқуқий ёки тиббий маслаҳат олиш тақиқланади.
Янги қоидалар миграция ва миллий хавфсизлик масалалари бўйича маслаҳат олишни ҳам чеклайди. Хизматлардан таҳдид, қўрқитиш, таъқиб ёки туҳмат қилиш, суицид мақсадида фойдаланиш мумкин эмас. Жинсий зўравонлик, терроризм, қурол яратиш, сотиб олиш ёки ундан фойдаланиш, қимор ўйинлари бўйича маслаҳатлар ҳам тақиқланади.
“Сиз лицензияни талаб қиладиган махсус маслаҳатлар учун бизнинг хизматларимиздан фойдалана олмайсиз”, дейилади OpenAI хабарида.
Компания, шунингдек, одамнинг розилигисиз унинг овози ёки реалистик тасвирини яратиш тақиқланганини билдирди. ChatGPT ёрдамида инсоннинг шахсий хусусиятларига қараб жиноят содир этиш эҳтимолини баҳолаш ҳам ман этилади.
“Одамлар шахсий ҳаёт дахлсизлиги ҳуқуқига эга. Шу сабабли биз бошқаларнинг махфийлигига путур етказишга қаратилган ҳаракатларга, жумладан, шахсий ёки махфий маълумотларни уларнинг рухсатисиз тўплаш, кузатиш ёки тарқатишга йўл қўймаймиз”, дейилади хабарда.
Бундан ташқари, вояга етмаганларнинг ташқи кўринишини баҳолаш ёки ёш чекловлари мавжуд товар ва хизматларга кириш имконини бериш ҳам тақиқланади.
“Болалар ва ўсмирлар алоҳида ҳимояга муҳтож. Бизнинг хизматларимиз уларга зарар етказишнинг олдини олиш ва фаровонлигини таъминлашга мўлжалланган бўлиб, 18 ёшдан кичик шахсларни ҳеч қачон эксплуатация қилиш, хавф остига қўйиш ёки жинсий объектга айлантириш учун ишлатилмаслиги шарт”, дейилади OpenAI сиёсатида.
Маълумот ўрнида, 14 октябрь куни OpenAI раҳбари Sam Altman X (собиқ Twitter) платформасида ChatGPT’да эротик контент жорий этилиши режалаштирилаётганини маълум қилганди.
“Декабрь ойидан бошлаб ёшга доир чекловлар тизими тўлиқ жорий этилгач, биз катталар учун мўлжалланган айрим материалларга, жумладан, эротик контентга ҳам рухсат берамиз”, деган эди у.
