ChatGPT ишга туширилганидан атиги уч йил ўтиб, унинг ойлик фаол фойдаланувчилари сони 1 миллиарддан ошди. Бу уни тарихдаги энг тез ўсган иловалардан бирига айлантирди. Бу ҳақда “Sensor Tower” таҳлилий компанияси маълум қилган.
Тадқиқотга кўра, ChatGPT ойига 1 миллиард фаол фойдаланувчи кўрсаткичига Google Maps, TikTok ва YouTube каби машҳур платформалардан анча тез эришган. Ушбу сервисларга бундай натижага чиқиш учун 5 йилдан 8 йилгача вақт кетган.
Шу билан бирга, таҳлилчилар тадқиқот маълум чекловларга эга эканини ҳам таъкидлаган. Баҳолаш OpenAI расмий статистикасига эмас, балки мустақил таҳлилларга асосланган. Бундан ташқари, ҳисоб-китобларда фақат ChatGPT мобил иловаси фойдаланувчилари инобатга олинган бўлиб, веб-версия ва дастурчилар учун мўлжалланган воситалар ҳисобга киритилмаган.
Статистика сервисдан қай даражада фойдаланилишини ҳам акс эттирмайди. Масалан, ҳар куни иловадан фойдаланадиган инсон ҳам, ойига бир марта кирувчи фойдаланувчи ҳам бир хил ҳисобланган.
“Sensor Tower” маълумотларига кўра, сўнгги бир йилда ChatGPT аудиторияси 62 фоизга ошган.
Шу билан бирга, рақобатчи сунъий интеллект хизмати Claude йил давомида тахминан 640 фоиз ўсишни намойиш этган. Бироқ унинг аудиторияси анча кичик бўлиб, ҳозирда тахминан 56 миллион фойдаланувчини ташкил қилади.
Тадқиқот шуни ҳам кўрсатдики, айрим фойдаланувчилар бир вақтнинг ўзида бир нечта сунъий интеллект платформаларидан фойдаланмоқда. Масалан, АҚШда йилнинг биринчи чорагида Claude иловасини ўрнатганлар орасида кейинги ойда ундан фойдаланиш вақти атиги 5 фоизга қисқарган. Таҳлилчилар бу ҳолатни муқобил платформаларга бўлган барқарор қизиқиш белгиси сифатида баҳоламоқда.
Ҳозирда ChatGPT оммавий бозорда етакчиликни сақлаб қолмоқда, Claude эса дастурчилар ва корпоратив мижозлар орасида ўз ўрнини мустаҳкамламоқда.
OpenAI аввалроқ энг фаол фойдаланувчилар учун ойига 110 долларлик ChatGPT Pro обунасини ҳам ишга туширган.
Мутахассислар сунъий интеллект бозорининг жадал ўсишини суҳбатлашувчи ёрдамчилар миллионлаб одамлар учун кундалик воситага айланиб бораётгани билан изоҳламоқда. Кўплаб фойдаланувчилар учун сунъий интеллектдан маълумот излаш интернетдаги анъанавий қидирув тизимларининг ўрнини босишни бошлаган.
