Ҳиндистон пойтахти Нью-Деҳли марказида кеча, 6 июнь куни ўзини “Тараканлар” партияси деб атаётган ҳаракатнинг юзлаб тарафдорлари илк йирик намойишга чиқди. Бу ҳақда “Associated Press” хабар берди.
Маълум қилинишича, бир неча ҳафта аввал интернет ҳазили сифатида пайдо бўлган ушбу ҳаракат қисқа вақт ичида мамлакат ёшлари норозилигининг рамзига айланган.
Жантар-Мантар майдонида ўтказилган митинг ҳаракат учун ижтимоий тармоқлардан ташқаридаги биринчи жиддий синов бўлган. Ташкилотчилар интернетдаги катта аудиторияни ҳақиқий сиёсий кучга айлантириш мумкинми-йўқми, шуни аниқлашга уринган.
Намойишда асосан ёшлар иштирок этган. Улар таракан тасвирланган плакатлар ва ниқоблар билан чиққан. Айрим иштирокчилар таълим олиш ва тенг имкониятлар ҳуқуқининг рамзи сифатида миллий байроқлар ҳамда китоблар олиб келган.
Ҳаракат Ҳиндистон Олий суди раиси Сурья Кантнинг баҳсли баёнотидан кейин пайдо бўлган. Суд мажлисларидан бирида у танқидчилар ва ишсиз ёшларнинг бир қисмини тараканларга қиёслаган эди.
Бу сўзлар жамоатчиликда катта норозиликка сабаб бўлган. Шундан сўнг Бостон университети талабаси ва сиёсий коммуникациялар бўйича мутахассис Абҳижит Дипке ушбу ҳақоратли қиёсни сатирага айлантириб, “Тараканлар” партияси номли сиёсий кампанияни бошлаган.
Ҳаракат қисқа вақт ичида интернетда оммалашиб кетган. Бир неча ҳафта давомида унинг саҳифалари миллионлаб обуначиларни жалб қилган, таракан эса чидамлилик ва норозилик рамзига айланган.
Тарафдорлар ишсизлик, коррупция, таълим тизимидаги муаммолар ва анъанавий сиёсатдан норозиликка бағишланган мемлар, видеороликлар ва сатиралар эълон қилиб келмоқда.
Намойишга Таълим вазири Дхармендра Прадҳаннинг истеъфосини талаб қилиш сабаб бўлган. Бунга имтиҳонларни ўтказиш жараёнидаги қонунбузарликлар билан боғлиқ можаро туртки берган.
Бироқ акция тез орада битта масала доирасидан чиқиб, ёш ҳиндистонликларнинг чекланган меҳнат имкониятлари ва иқтисодий қийинчиликлардан норозилигини ифода этувчи кенгроқ ҳаракатга айланган.
Намойиш иштирокчилари “Тараканлар келмоқда – Дхармендра Прадҳан кетмоқда!” дея шиорлар айтиб, ҳукуматни ёшлар муаммоларига эътибор қаратишга чақирган.
