Ўзбекистон Ташқи ишлар вазирлиги Саудия Арабистони подшоҳлигидаги муқаддас Макка шаҳрига йўналтирилган учувчисиз учиш аппаратидан фойдаланилган ҳужумга уринишни қатъий қоралади.
“Саудия Арабистони подшоҳлиги билан тўлиқ бирдамлигимизни билдирамиз ҳамда муқаддас қадамжолар, тинч аҳоли ва фуқаролик инфратузилмасига таҳдид солувчи ҳар қандай ҳаракатларни номақбул деб ҳисоблаймиз”, дейилади баёнотда.
Ўзбекистон томони, барча томонларни максимал даражада вазминлик намоён этишга, халқаро ҳуқуқ нормаларига қатъий риоя қилишга, давлатларнинг суверенитети, мустақиллиги ва ҳудудий яхлитлигини ҳурмат қилишга чақирган.
“Кескинликни камайтириш, можаронинг янада тарқалишининг олдини олиш ҳамда минтақада тинчлик, хавфсизлик ва барқарорликни таъминлашга қаратилган саъй-ҳаракатларни қўллаб-қувватлаймиз”, дейилади хабарда.
Маълумот учун, 16 сентябрь куни Макка шаҳри томон учирилган ҳусийлар дрони Саудия Арабистони томонидан уриб туширилганди.
Дрон муқаддас шаҳар устидаги тақиқланган ҳаво ҳудудига киришидан олдин йўқ қилинган. Саудия бошчилигидаги Ямандаги ҳарбий коалиция вакили Турки ал-Малкининг айтишича, бу ҳусийларнинг 2017 йил июлида баллистик ракета учирганидан кейин Маккани нишонга олишга бўлган иккинчи уриниши ҳисобланади.
