АҚШ Миллий аэронавтика ва коинотни тадқиқ қилиш бошқармаси (NASA) “Нэнси Грэйс Роман” космик телескопини учиришга тайёргарлик кўрмоқда. SpaceX компаниясининг Falcon Heavy ракетаси учирилиши жорий йил 30 августга режалаштирилган. Парвоз дастлабки жадвалдан тўққиз ой олдин амалга оширилади. Бу ҳақда NASA хабар берди.
Қайд этилишича, янги аппаратнинг асосий афзаллиги – телескопнинг кўриш майдони “Хаббл”никига қараганда камида 100 баравар кенгроқ.
Телескоп ўз хизмати давомида тахминан 1 миллиард галактикадан келаётган нурланишни қайд этади. Бу “Хаббл” томонидан 37 йиллик кузатувлар давомида тўпланган маълумотлар ҳажмидан сезиларли даражада кўп. Обсерватория иккита илмий ускуна билан таъминланган: инфрақизил хариталарни яратиш ва гравитацион микролинзалаш усули билан экзопланеталарни қидириш учун кенг майдонли камера ҳамда олис оламларнинг тўғридан тўғри тасвирларини олиш учун коронограф.
Телескоп Ердан тахминан 1,5 миллион километр узоқликдаги масофага – “Жеймс Уэбб” обсерваторияси фаолият юритаётган нуқтага йўл олади. Миссиянинг асосий вазифалари қоронғу энергия ва қоронғу материя табиатини очиб бериш ҳамда Сомон Йўли сайёра тизимларининг батафсил рўйхатини тузишдан иборат бўлади.
Космик аппарат NASA’нинг биринчи бош астрономи Нэнси Грэйс Роман шарафига номланган. У биринчи орбитал телескопни яратишга қўшган катта ҳиссаси учун илмий ҳамжамиятда “Хабблнинг онаси” деб аталади.
Янги обсерватория бир жойда жойлашган “Жеймс Уэбб” телескопининг ишини тўлдиради: “Уэбб” аниқ нуқтадаги объектларни батафсил ўрганиш билан шуғулланса, Нэнси Роман телескопи Коинотнинг кенг миқёсли ҳудудларини панорамали кўринишини таъминлайди.
