АҚШ Президенти Дональд Трамп кеча, 20 август куни мамлакатдаги тижорий космик парвозлар сонини кескин оширишга қаратилган меморандумни имзолади. Бу ҳақда “Reuters“ хабар берди.
Ҳужжатга кўра, федерал идоралар янги ракета учириш ва қайта қўниш майдонлари учун давлат ерларини ўрганиши керак бўлади. Оқ уй 2030 йилга бориб йилига камида 1000 та ракета учирилиши ва Ерга қайта қўниши учун шароит яратишни мақсад қилган.
Қайд этилишича, 2025 йилда АҚШда 178 та космик учириш амалга оширилган. Бу кўрсаткич 2013 йилга нисбатан 10 баравар юқори бўлиб, учиришларнинг катта қисми Илон Маскнинг SpaceX компанияси ҳиссасига тўғри келган.
Меморандумда давлат идораларига хусусий компаниялар билан ҳамкорликда космик транспорт инфратузилмасини ривожлантириш, рухсат бериш ва экологик экспертиза жараёнларини тезлаштириш ҳамда космик учиришлар учун етарли радиочастота спектрини таъминлаш топширилган.
Шунингдек, Трамп АҚШ астронавтларини 2028 йилга қадар Ойга қайтаришни мақсад қилган. Ҳужжат NASA’га Ойга тижорий транспорт қатновларини йўлга қўйиш, Марсга роботлаштирилган тижорий миссияларни ташкил этиш ва одамларни Марсга юбориш имкониятларини ўрганишни юклайди.
Оқ уй Фан ва технологиялар сиёсати бошқармаси директори Майкл Крациоснинг айтишича, янги сиёсат АҚШнинг космик соҳадаги етакчилигини мустаҳкамлашга хизмат қилади.
Меморандумга кўра, 90 кун ичида янги федерал қайта қўниш майдони аниқланиши керак. Бундан ташқари, давлат идоралари жамоат ёки миллий хавфсизлик талаб қилмаган тақдирда хусусий космик компаниялар фаолиятига тўсқинлик қиладиган лойиҳаларни амалга оширмаслиги лозим.
Маълумот учун, SpaceX 2025 йилда 170 та ракета учирган ва орбитага қарийб 2500 та сунъий йўлдош жойлаштирган. Компания беш йил ичида йилига 10 мингтагача учиришни амалга оширишни режалаштирмоқда.
