АҚШдан Хитойга парвоз пайтида самолёт салонининг герметиклигини бузишга уринган эркак қамоққа олинди. Бу ҳақда The New York Post нашри хабар берди.
Воқеа 10 декабрь куни Бостондан Гонконгга кетаётган рейсда юз берди. Cathay Pacific авиакомпаниясининг йўловчилар билан тўла самолёти ҳавода эканида 20 ёшли саёҳатчи кириш эшигини очишга уринган.
“Бизнинг борт ходимларимиз вазиятга дарҳол муносабат билдирди, эшикнинг ишончли ёпилганини текшириб, ҳодиса ҳақида тегишли органларга ва полицияга хабар берди”, деди авиакомпания вакили.
Самолёт белгиланган аэропортга қўнгач, эркак ҳибсга олинди. Айбдор Хитой Халқ Республикаси фуқароси бўлиб, унга нисбатан авиация хавфсизлиги тўғрисидаги қонунни бузганлик айби қўйилди.
