Фарғона ва Андижон вилоятларида яшириб олиб ўтилиши режа қилинган 700 млн сўмлик тилла аниқланди. Бу ҳақда Давлат хавфсизлик хизмати хабар берди.
Қайд этилишича, ДХХ Фарғона вилояти бўйича бошқармаси ҳамда вилоят божхона бошқармаси ходимлари томонидан Тошкент халқаро аэропортида ўтказилган тезкор тадбирда хориждан учиб келган, 1980 йилда туғилган чет эл фуқароси холислар иштирокида шахсий тинтувдан ўтказилган.
Натижада у умумий қиймати 290 млн 516 минг сўмни ташкил қилувчи, соф оғирлиги 226 грамм бўлган тилла буюмларни оёқлари остига яширган ҳолда божхона назоратидан олиб ўтганлиги аниқланиб, ушбу заргарлик маҳсулотлари процессуал тартибда расмийлаштириб олинган.
Ҳолат юзасидан хорижий давлат фуқаросига нисбатан жиноят иши қўзғатилиб, тергов ҳаракатлари бошланган.
Андижон вилоятидаги ҳолатда эса Андижон шаҳрида яшовчи, 29 ёшли фуқаро Қирғиз Республикасидан “Дўстлик” халқаро назорат ўтказиш пункти орқали кириб келган пайтда тўхтатилиб, текширилган. Унинг ёнидан божхона декларациясида кўрсатилмаган, тахминий баҳоси 400 млн сўмлик 241 грамм тилла буюмлар борлиги аниқланган.
Аниқланишича, ушбу заргарлик маҳсулотлари сотиш мақсадида Туркия давлатидан Қирғиз Республикаси орқали олиб келинаётган бўлган.
Ҳозирда олинган ашёвий далилларга нисбатан экспертиза тайинланиб, ҳолат юзасидан суриштирув ишлари бошланган.
