Россиянинг Москва шаҳрида уч нафар қирғизистонлик ис газидан заҳарланиб вафот этди. Бу ҳақда “Turmush” хабар берди.
Қайд этилишича, улар Москвадаги Дмитров қишлоғидаги қурилишда ишлаган ва қурувчилар учун ўрнатилган контейнер ичида ис газидан заҳарланиб вафот этган. Уларнинг жасадлари бугун, 30 апрель куни Қирғизистонга жўнатилмоқда.
Марҳумлар Қирғизистоннинг Жалолобод вилояти Бозор-Қўрғон туманидан бўлган. Ҳалок бўлганлардан бири – 21 ёшли Мизамбек бўлиб, қишлоқдошларининг айтишича, у жорий йилнинг 5 май куни уйига қайтиш учун авиачипта сотиб олган.
“Ёш йигитларнинг ўлими барчамиз учун оғир йўқотиш бўлди. Мизамбек оиладаги тўнғич фарзанд эди. У олий ўқув юртига сиртқи бўлимга ўқишга кирган. Ўтган йили эса ота-онасига ёрдам бериш учун Россияга ишлашга кетган. Аввал ошхонада ишлаган, яқинда қурилишга ўтганди. Бу йил ўқишини тугатиши керак эди ва 5 май кунига чипта ҳам олган эди. Эртага соат 11:00 да уни дафн этишмоқчи”, дейди қишлоқ аҳолисидан бири.
Маълумотларга кўра, иккинчи йигит 29 ёшда бўлган. Унинг ортида турмуш ўртоғи ва фарзандлари қолган. Учинчи марҳумнинг шахси ҳозирча аниқланмаган, бироқ у ҳам шу ҳудуддан бўлгани айтилмоқда.
Мазкур ҳолат юзасидан Қирғизистон Ташқи ишлар вазирлиги ҳозирда элчихона билан биргаликда воқеа тафсилотларини аниқлаётганини ҳамда жасадларни ватанга қайтариш чораларини кўраётганини маълум қилган.
