Россиянинг Тюмень шаҳрида 5 ёшли қизга нисбатан жинсий зўравонлик қилишга уринганликда айбланаётган 44 ёшли эркак судда айбини тан олди ва қилмишидан пушаймон эканини билдирди. Бу ҳақда вилоят суд тизимининг бирлашган матбуот хизмати хабар берди.
Маълум қилинишича, 28 май куни эркак қизчага нисбатан куч ишлатиб, уни кўп қаватли уй кириш йўлагига олиб кирган ва жинсий характердаги зўравонлик ҳаракатларини содир этишга уринган.
Ҳолат юзасидан жиноят иши қўзғатилган. Суд гумонланувчини икки ой муддатга қамоқда сақлаш чораси билан ҳибсга олган.
Ижтимоий тармоқларда тарқалган кузатув камералари тасвирларида эркак қизчани кўтариб кириш йўлагига олиб кираётгани, қизалоқ эса ёрдам сўраб қаршилик кўрсатаётгани акс этган.
Эркакнинг жиноий нияти амалга ошишига икки нафар ўсмирнинг аралашуви тўсқинлик қилган. Улар воқеани кўриб, яқин атрофдаги аёлнинг эътиборини тортган. Аёл дарҳол кириш йўлагига кириб, қизчани эркак қўлидан қутқариб қолган.
Қизалоқни қутқариб қолган аёлнинг айтишича, у тасодифан қўшни ҳовлига кириб қолган ва болаларнинг қичқираётганини эшитган. Болалар қўлидаги қизни олиб кетаётган эркакни тўхтатишга уринаётган бўлган.
