Польшанинг иккита “МиГ-29” қирувчи самолёти Болтиқ денгизи устида парвоз қилаётган Россиянинг Ил-20 разведка самолётини тутиб олди. Бу ҳақда Польша мудофаа вазири Владислав Косиняк-Камиш хабар берди.
Сўнгги кунларда бу каби ҳодиса икки марта кузатилди. 30 октябрь куни эрталаб Россия самолёти халқаро ҳаво ҳудудида транспондери ўчирилган ҳолда учган ва парвоз режасини тақдим этмаган. Польша ҳаво ҳудудида ҳеч қандай қоидабузарлик қайд этилмаган.
“Навбатчи бригадалар, учувчилар ва қуруқликдаги ходимларнинг юқори жанговар тайёргарлиги ва профессионаллиги туфайли операция тезкор, самарали ва хавфсиз ўтди”, дейди Польша тезкор қўмондонлиги.
Учоқни тутиб олиш 29 октябрдан 30 октябрга ўтар кечаси Россиянинг Украинага йирик зарбалари фонида содир бўлди. Польшада тун бўйи ҳаво ва ракетага қарши мудофаа тизимлари ишлади. Шунингдек, НАТО қирувчи самолётлари ҳавога кўтарилди.
Польша 28 октябрь куни ҳам худди шундай ҳолатни эълон қилганди
Ўшанда Россиянинг “Ил-20” самолёти Болтиқ денгизининг халқаро сувлари устида парвозни режасиз ва транспондерни ўчирган ҳолда амалга оширган. Авиатехника Польша ҳаво ҳудудига кирмаган. Россия Мудофаа вазирлиги юқоридаги икки ҳодисага изоҳ бермаган.
НАТО ҳаво ҳудудидаги самолётлар ва дронлар
Россиянинг Украинага қарши уруши фонида НАТО давлатлари ўз ҳаво ҳудудига дронлар ва самолётлар бостириб кирганини бир неча бор қайд этган. Баъзи авиатехникалар Россияга тегишли. 10 сентябрга ўтар кечаси Россиянинг 19 та дрони Польша чегарасини кесиб ўтди, уларнинг аксарияти Беларусьдан учиб келган. Уларни тутиб олиш учун Польша ва бошқа НАТО давлатларининг қирувчи самолётлари жалб қилинган. Варшава буни “Россиянинг онгли ҳужуми” деб атаган ва Шимолий Атлантика шартномасининг 4-моддасига мувофиқ НАТО иттифоқчилари билан маслаҳатлашишни сўраган. Москва айбловларни исботсиз деб атади.
