Колумбия президенти Густаво Петронинг самолётига АҚШ санкциялари туфайли Испания ҳудудида ёнилғи берилмади. Бу ҳақда Испаниянинг El Pais нашри хабар берди.
Петро бу ҳафта расмий ташриф билан Яқин Шарқ давлатларида бўлади. Унинг самолёти Саудия Арабистонига кетаётиб ёнилғи қуйиш учун Мадриддаги Барахас аэропортига қўнган. Бироқ барча ёнилғи компаниялари АҚШ санкцияларини бузишдан қўрқиб, самолётга хизмат кўрсатишдан бош тортган. Натижада президент борти йўналишни ўзгартиришга ва ёнилғи қуйишнинг муқобил вариантларини излашга мажбур бўлган. Охир-оқибат муаммони Испания ҳукумати ҳал қилган: самолёт ҳарбий авиабазага кўчирилган. Учоқ у ерда ёнилғи қуйиб, йўналишини давом эттира олган.
Колумбия ҳукумати воқеани “йўл қўйиб бўлмайдиган” ва делегация хавфсизлиги учун хавф туғдирган ҳолат деб баҳолаган. Ўтган ҳафтада Колумбия президенти АҚШ гиёҳванд моддалар савдоси билан алоқадорликда айбланаётган шахслар (OFAC)рўйхатига киритилди. АҚШ Молия вазирлиги даъвосига кўра, президент “наркотикларнинг ноқонуний айланишида муҳим рол ўйнайди” ва “Колумбияда кокаин ишлаб чиқаришнинг кескин ўсишига, наркотеррористик ташкилотларга имтиёзлар беришга” масъул.
Сиёсатчининг ўзи мазкур айбловларни рад этиб келмоқда. Колумбия ҳукумати Петронинг санкциялар рўйхатига киритилишини “президентнинг шаъни ва қадр-қимматини камситувчи ҳақоратли ҳаракат” деб атади. Шу муносабат билан ҳукумат АҚШдаги элчиси Даниэль Гарсия-Пеняни маслаҳатлашув учун чақириб олди.
