АҚШ Президенти Дональд Трамп Колумбияга нисбатан ҳарбий чоралар кўриш билан таҳдид қилганидан бир неча кун ўтиб, кеча, 7-январда Колумбия Президенти Густаво Петро билан телефон орқали суҳбатлашгани ва уни Оқ уйга таклиф қилганини маълум қилди. Бу ҳақда у Truth Social ижтимоий тармоғида ёзди.
Қайд этилишича, Трамп ва Петро суҳбатда икки давлат ўртасидаги муносабатларни муҳокама қилган. Бу уларнинг илк суҳбати бўлиб, мулоқот Трамп 4 январь куни Колумбия ҳукуматига қарши АҚШ ҳарбий амалиётини ўтказиш “яхши фикр” эканлигини айтганидан кейин бўлиб ўтди. Ушбу таҳдид Трампнинг қўшни Венесуэла президенти Николас Мадурони АҚШ ҳарбийлари томонидан қўлга олиниши ва Манҳеттенга олиб кетилиши ортидан янграган эди.
“Колумбия Президенти Густаво Петро билан гаплашиш мен учун катта шараф бўлди. Суҳбат чоғида гиёҳванд моддалар ва ўртамизда юзага келган бошқа келишмовчиликларга ойдинлик киритилди. Мен унинг қўнғироғи ва суҳбат оҳангини юқори баҳолайман ҳамда яқин келажакда у билан учрашишни
интиқлик билан кутаман”, деб ёзди Трамп ўзининг ижтимоий тармоғида.
Оқ уй раҳбарининг айтишича, Вашингтонда учрашувни ташкил этиш ишлари бошланган, бироқ аниқ сана очиқланмаган.
“Reuters”га кўра, Колумбия етакчиси Боготада ўтказилган митингда чиқиш қилиб, президент бўлганидан буён Трамп билан илк бор телефон орқали гаплашганини ва икки мамлакат ўртасида муносабатларни қайта тиклашни сўраганини айтган. Шунингдек, у қўнғироқ “самимий ва ҳурматга асосланган” тарзда ўтганини маълум қилган.
