Наманган вилояти Норин туманида криптоактивлар айланмаси билан ноқонуний шуғулланган шахс аниқланди. Бу ҳақда вилоят Ички ишлар бошқармаси хабар берди.
Маълум қилинишича, республика бўйлаб ўтказилаётган “Хавфсиз ва соғлом юрт” кенг қамровли тезкор-профилактик тадбирларининг биринчи босқичи доирасида вилоят ИИБ Ахборот технологиялари соҳасидаги жиноятларга қарши кураш бошқармаси ходимлари томонидан Норин туманида тезкор-техник тадбирлар ўтказилган.
Унда 2003 йилда туғилган фуқаро Binance биржа платформаси орқали криптоактивлар айланмаси билан тегишли лицензия расмийлаштирмасдан шуғуллангани аниқланган.
Текширув давомида ушбу шахс 2024 йил март ойидан 26 майга қадар Binance’даги аккаунти орқали 119 та транзакция амалга оширгани, уларнинг умумий қиймати 982 миллион 367 минг сўмни ташкил этгани маълум бўлган.
Тадбирлар давомида фуқаронинг Redmi Note 10S русумли мобил телефони ашёвий далил сифатида олинган. Мазкур ҳолат юзасидан Жиноят кодексининг 278-модда прим 8 3-қисми “а” банди билан жиноят иши қўзғатилган бўлиб, ҳозирда дастлабки тергов ҳаракатлари олиб борилмоқда.
Ички ишлар органлари фуқароларни криптоактивлар орқали катта даромад ваъда қилувчи шубҳали таклифларга ишонмасликка ҳамда бундай ҳолатлар юзасидан ҳуқуқни муҳофаза қилувчи органларга мурожаат қилишга чақирди.
