Фарғона вилояти Ўзбекистон туманида хизмат вазифасини бажараётган сув таъминоти ходими калтаклангани юзасидан жиноят иши қўзғатилди. Бу ҳақда Бош прокуратура хабар берди.
Маълум қилинишича, 9 март куни “Фарғона сув таъминоти” МЧЖнинг Ўзбекистон тумани филиали инспектори Д.С. тумандаги Сочтепа кўчасида жойлашган хонадонлардан бирига борган. У ерда сув таъминоти ҳолатини ўрганиш жараёнида рўйхатдан ўтказилмаган сув ҳисоблагичи мавжудлиги аниқланган.
Шундан сўнг тегишли ҳужжатлар расмийлаштирилиб, жарима қўлланиши ҳақида хонадон эгасига маълум қилинган. Шу пайтда ушбу хонадонда яшовчи фуқаро Ф.П. хизмат вазифасини бажараётган инспекторга қаршилик кўрсатиб, у билан жанжаллашган. Жанжал давомида фуқаро ёғоч бўлаги билан инспектор Д.С.нинг бош қисмига уриб, унга тан жароҳати етказган.
“Фарғона сув таъминоти” АЖнинг қўшимча қилишича, директорнинг тегишли буйруғига асосан вилоятнинг барча шаҳар ва туманларида дебитор қарздорликларни ҳамда ноқонуний уланишларни аниқлаш ва бартараф этиш мақсадида назорат рейд тадбирлари ўтказилмоқда.
Жабрланган ходимга зудлик билан тиббий ёрдам кўрсатилган ҳамда ҳолат юзасидан туман ички ишлар бўлимига хабар берилган. Айни пайтда воқеа бўйича ҳуқуқ-тартибот органлари томонидан суриштирув ишлари олиб борилмоқда.
Мазкур ҳолат юзасидан Жиноят кодексининг 219-моддаси 2-қисми билан жиноят иши қўзғатилиб, гумонланувчи Ф.П. процессуал тартибда ушланган. Ҳозирда прокуратура томонидан тергов ҳаракатлари олиб борилмоқда.
