Тошкент шаҳар сув таъминоти корхонаси ташкилот ходими эканини айтиб, хонадонларга киришга уринган шахслар юзасидан изоҳ берди.
Қайд этилишича, пойтахтнинг Олмазор туманида номаълум шахслар ўзларини “Сувсоз” ходимлари сифатида таништириб, хонадондаги яшовчилар сонини сўраган ва “лабораториядан келдик” деган баҳона билан уйларга киришга ҳаракат қилган.
“Тошкент шаҳар сув таъминоти” АЖ мутасаддилари ҳолат юзасидан олиб борган ўрганишларда ушбу фуқароларнинг корхонага мутлақо алоқаси йўқлиги маълум бўлган. Уларнинг асли нима мақсадда хонадонларга боргани ҳам номаълумлигича қолмоқда.
Бундай ҳолатларнинг олдини олиш ҳамда такрорланмаслигини таъминлаш мақсадида юз берган воқеа ҳақида ҳуқуқ-тартибот органларига маълумот берилиши ва амалдаги тартибга мувофиқ зарур чоралар кўрилиши таъкидланди.
