Туркиянинг Ҳатай вилоятида трихобезоар ташхиси қўйилган 14 ёшли қизнинг ошқозонидан 3 кг соч ўрами чиқарилди. Бу ҳақда “Аnadolu” хабар берди.
Қайд этилишича, қорин оғриғи ва кўнгил айниши билан шифохонага олиб борилган қизга соч ейиш одати туфайли “трихобезоар” ташхиси қўйилган.
Шифокор кўригида унинг ошқозонидан ичагигача узайган катта ҳажмдаги соч тўплами аниқланган ва операция натижасида олиб ташланган.
Қизнинг онаси – Ҳожар Бўнжеўғли фарзандида соч ейиш одати 2023 йил 6 февралдаги зилзилалардан кейин бошланганини айтган. Унинг сўзларига кўра, қизи ўша даврда кучли стрессни бошдан кечирган ва сочларини тортиб, оғзига солаётганини кўрган.
Ҳатай Мустафо Камол университети тиббиёт факультети Болалар саломатлиги ва касалликлари кафедраси мудири, профессор Чиғдем Элнинг айтишича, бундай ҳолатлар соч ейиш одати туфайли келиб чиқади ва эрта ташхис ҳамда тезкор муолажа жуда муҳим аҳамиятга эга.
Жарроҳлик амалиёти ўз вақтида амалга оширилгани сабабли ошқозон ва ичакларда қон айланиши бузилмаган, тўқималар чириш ёки тешилиш ҳолатига етиб бормаган.
