Украина Президенти Владимир Зеленский Россия билан тинчлик музокараларини фаоллаштириш мақсадида Туркияга ташриф буюришини эълон қилди.
“Эртага Туркияда учрашувлар бўлиб ўтади. Музокараларни фаоллаштиришни тайёрлаяпмиз ва шерикларимизга таклиф этиладиган ишлаб чиқилган ечимларимиз бор. Урушни якунлашни яқинлаштириш Украинанинг биринчи даражали вазифаси. Асирларни алмашиш ва уларни қайтаришни ҳам тиклаш устида ишлаяпмиз”, деб ёзди у бугун, 18 ноябрь куни ижтимоий тармоқларда.
Шундан кўп ўтмай, Туркиядаги манба “Reuters” агентлигига АҚШнинг махсус вакили Стив Уиткофф 19 ноябрь куни Туркияга ташриф буюришини ва Зеленский билан ўтказиладиган музокараларда иштирок этишини маълум қилди. AFP эса украин манбаларига таяниб, Зеленский Анқарада Туркия Президенти Ражаб Тойиб Эрдўған билан учрашиши ҳақида хабар берди.
Россия Президенти Владимир Путиннинг матбуот котиби Дмитрий Песков Россия томони Киевдан “ҳеч қандай маълумот олмаганини” билдирди. Унга кўра, Зеленский Туркияга келадиган кунларда у ерда Россия вакиллари бўлмайди.
Истанбулда Россия–Украина музокаралари
Украинадаги уруш бошланганидан бери Туркия Киев ва Москва ўртасида воситачи бўлишни таклиф қилиб келмоқда. Жорий йил май ойидан бери Россия ва Украина делегациялари Истанбулда бир нечта музокара раундларини ўтказди. Улар давомида асирларни алмашиш бўйича келишувларга эришилди, аммо оташкесим тўғрисида келишувда сезиларли илгарилаш кузатилмади. Охирги алмашув октябрь бошларида амалга оширилиб, Москва ва Киев 185 тадан одамни алмашди.
Украина Россияни урушни тўхтатишни истамасликда айблаб келади. Киевнинг таъкидлашича, Москва доим қабул қилиб бўлмайдиган шартларни қўйиб, ўзга ҳудудларни таклиф этишни ва Киевнинг амалда Россия олдида таслим бўлишини талаб қилган.
Зеленский Европага сафари чоғида Украинага қўллов олишга интилмоқда. Бу Россиянинг Украина энергетика тизимига қилинаётган зарбалари ва мамлакатни қамраб олган коррупция можароси фонида амалга ошмоқда. 18 ноябрь куни у Испания Бош вазири Педро Санчес билан учрашади. Бир кун олдин эса у Франция билан Киевнинг 100 тагача жанговор учоқ ва бошқа техника, жумладан дронлар сотиб олишини кўзда тутувчи келишувни имзолаганди.
Украина музокараларни тўхтатганини эълон қилган эди
11 ноябрь куни Украина Ташқи ишлар вазирининг ўринбосари Сергей Кислица Киев ва Москва ўртасидаги тинчлик музокаралари прогресс йўқлиги сабабли тўхтатилганини маълум қилган.
“Диктатура шароитида (Россияда) диктаторни ифода этувчи музокарачилар билан самарали мулоқот олиб бориб бўлмайди. Улар қаттиқ мандатга эга ва уларга буюрилган позицияни ҳимоя қилиши шарт”, деган эди Кислица.
Шу билан бирга, 16 ноябрь куни Киев Россия билан асирлар алмашинувига оид билвосита музокаралар яна бошланганини билдирди. Украина Миллий хавфсизлик ва мудофаа кенгаши (МҲМК) котиби Рустам Умаровнинг айтишича, гап “Истанбул келишувлари” доирасида алмашинувни тиклаш ҳақида кетмоқда. Туркия ва БАА бу жараённинг воситачилари бўлган.
“Яқин кунларда техник маслаҳатлар ўтказилади. Улар барча тартибий ва ташкилий жиҳатларни мустаҳкамлаши керак”, деди Умаров.
