Россия Хавфсизлик кенгаши котиби Сергей Шойгуга уюштирилиши режалаштирилган суиқасднинг олди олинди. Бу ҳақда манбаларга таяниб, “Московский комсомолец” хабар берди.
Федерал хавфсизлик хизмати (ФХХ) 14 ноябрь куни Троекуровский қабристонида Россиянинг юқори мартабали амалдорларидан бирига суиқасд уюштиришга уриниш фош этилганини маълум қилди. Идора маълумотига кўра, ҳужум “Украина топшириғи билан” амалдор яқин қариндошлари қабрини зиёрат қилган пайтда амалга оширилиши режалаштирилган. ФХХ баёнотида амалдор номи кўрсатилмаган.
Тергов доирасида бир нечта шахс, жумладан эр-хотин қўлга олинган. Уларнинг кўрсатмаларига (ФХХ тарқатган сўроқ видеосига) кўра, интернетда танишган “Руслан” исмли шахснинг топшириғи билан ҳаракат қилган.
“Руслан” улардан қабристонга бориб, қабрлардан бирининг ёнига гул солинган гулдонни қўйиб кетишни сўраган. Гулдон ичида камера ва, гумонланувчилардан бирининг фикрича, портловчи мослама бўлган. Вазифани бажариш эвазига уларга метадон берилиши ваъда қилинган. Эр-хотин уйга қайтаётганида қўлга олинган.
Троекурово қабристонида Сергей Шойгунинг ота-онаси — Кужугет Сереевич ва Александра Яковлевна — дафн этилган. Онасининг вафот этган куни 12 ноябрь санасига тўғри келади. Шунингдек, 2021-йилда вафот этган Хавфсизлик кенгаши котибининг синглиси Лариса Шойгу ҳам шу қабристонга дафн этилган.
Қабристон ходимининг айтишича, портловчи қурилмаларни текширувчи мутахассислар масофадан бошқариладиган махсус тракторни айнан Шойгу ота-онаси қабр жойлашган участкага йўналтирган. Хавфсизлик кенгаши воқеа юзасидан изоҳ беришдан бош тортди.
