Исроил Бош вазири Биньямин Нетаньяхунинг ҳарбий котиби генерал-майор Роман Гофман мамлакат ташқи разведка хизмати – “Моссад” раҳбари этиб тайинланди. Бу ҳақда Исроил ҳукумати раҳбарининг идораси хабар берди.
Маълум қилинишича, Гофман ушбу лавозимга 2026 йилнинг 2 июнидан расман киришади.
Гофман номзоди раҳбар лавозимларига тайинлаш бўйича маслаҳат қўмитаси томонидан тасдиқланганидан сўнг, Биньямин Нетаньяху тегишли фармонни имзолаган. Бу қарор ҳақида у илк бор 2025 йил декабрида маълум қилган ва турли номзодлар орасидан айнан Гофманни “энг муносиб” деб топган.
Роман Гофман ушбу лавозимда Давид Барнеанинг ўрнини босади. Барнеанинг беш йиллик ваколат муддати 2026 йил июнда якунланади.
Гофман 1976 йил Беларуснинг Мозир шаҳрида туғилган. 1990 йилда оиласи билан Исроилга кўчиб ўтган ва 1995 йилда армия сафида хизматни бошлаган. У бронетанк қўшинларида хизмат қилиб, кейинчалик офицерлик лавозимларида турли бўлинмаларга, ҳатто дивизия даражасигача қўмондонлик қилган. 2022 йилда қуруқлик қўшинлари Миллий ўқув марказига раҳбарлик қилган, 2024 йил май ойида эса бош вазирнинг ҳарбий котиби лавозимига тайинланган.
