Тошкент—Чирчиқ йўналишидаги автобусда вояга етмаган қизга шилқимлик қилган эркак 10 суткага қамалди.
Аниқланишича, 2026-йилнинг 31 январь куни соат 14:40 ларда Зангиота туманида яшовчи Т.М. Тошкент-Чирчиқ йўналишидаги автобусда кетаётган вақтда 2008 йилда туғилган қизга тегиниб, шаҳвоний ҳаракатлар содир этган. Унинг ҳаракатларидан қўрқиб кетган қиз манзилга етмасдан автобусдан тушиб қолган.
Қизнинг йиғлаб турганини кўрган фуқаролар ундан нима бўлганини сўрашган. У бўлган воқеани айтиб бергач, атрофдагилар эркакни ушлашган. Шунда Т.М. жамоат жойида бақир-чақир қилиб, жанжал кўтарган, қолаверса воқеа жойига келган ички ишлар органлари ходимларининг қонуний талабларини бажармаган.
Суд мажлисида эркак айбига қисман иқрор бўлиб, автобусда одам кўп бўлгани учун шундай ҳолат юз берган бўлиши мумкинлигини билдирган. Бироқ жабрланувчи кўрсатуви ва иш материалларидаги бошқа далиллар унинг ҳаракатлари содир этилганини тасдиқлаган.
Жиноят ишлари бўйича Зангиота туман суди уни Маъмурий жавобгарлик тўғрисидаги кодекснинг 41-¹моддаси 1-қисми (шаҳвоний шилқимлик қилиш), 183-моддаси (майда безорилик) ва 194-моддаси 1-қисмида (милиция ходимининг қонуний талабларини бажармаслик) назарда тутилган ҳуқуқбузарликларда айбли деб топган. Унга нисбатан узил-кесил 10 сутка маъмурий қамоқ ҳамда базавий ҳисоблаш миқдорининг 5 баравари, яъни 2 миллион 60 минг сўм жарима жазоси тайинланган.
