АҚШ Президенти Дональд Трамп АҚШ яқин орада Эрон билан урушни якунлашини маълум қилди. Бу ҳақда у журналистлар билан ўтган матбуот анжуманида сўз очди.
Трампнинг сўзларига кўра, Вашингтон Эрон билан олиб борилаётган ҳарбий ҳаракатларни тез орада якунлашни режалаштирмоқда ва бу қарор муқаррар бўлади. У якуний натижа қандай йўл билан бўлишидан қатъи назар, жараён тугашини таъкидлади.
У икки хил вариант мавжудлигини айтди. Биринчи вариант – Эрон билан икки томонлама келишув имзолаш. Трамп бу вариантни рамзий тарзда “бир варақ қоғоз” деб атади. Иккинчи вариант эса янада қатъий чораларни қўллаш бўлиб, унинг фикрича, бу йўл амалга ошириш жиҳатидан ҳатто осонроқ бўлиши мумкин.
“Қандай бўлмасин, бу хоҳ бир варақ қоғоз орқали бўлсин, хоҳ қатъий усуллар билан бўлсин, уруш якунланади”, деган Оқ уй раҳбари.
Унга кўра, операция асосан аллақачон якунланган ва натижа яқин вақт ичида аниқ бўлади.
Президент аниқ муддатлар ёки келишув тафсилотларини бермаган, фақат жараён қатъий тус олишини қайд этган. Ушбу баёнот Висконсин штатида ўтказилган тадбир давомида янграган бўлиб, у ерда асосан ички иқтисодий масалалар муҳокама қилинган.
Шу билан бирга, Эрон Ислом инқилоби қўриқчилари корпуси матбуот хизмати минтақадаги навбатдаги кескинлик босқичи бўйича музокаралар жараёнини Эрон олий раҳбари Мужтабо Хоманаий назорат қилаётганини билдирган.
Шунингдек, АҚШ ва Теҳрон ўртасида музокаралар бошланган бўлиб, бу жараёнда Покистон воситачи сифатида иштирок этаётгани айтилган. Бу ҳолат Яқин Шарқдаги кескинликни камайтириши мумкинлиги таъкидланган.
