Биткоин нархи 2024 йил октябридан бери илк бор 60 минг долларлик психологик чегарадан пастга тушди. Криптовалюта ҳафтани қарийб 17 фоизлик пасайиш билан якунламоқда.
MarketWatch маълумотларига кўра, биткоиннинг қиймати савдолар давомида 59 814 долларгача тушиб кетган.
Таҳлилчиларнинг фикрича, бу ҳафтадаги кескин пасайишга Strategy Inc. компаниясининг 32 та биткоинни 2,5 миллион долларга сотгани ҳақидаги хабарлар таъсир кўрсатган. Биткоиннинг йирик эгалари қаторига кирувчи мазкур компания 2022 йил декабридан бери биринчи марта ўз криптоактивларининг бир қисмини сотди.
Жума куни эса бозордаги пасайиш янада кучайди. Бунга инвесторларнинг таваккалчиликка бўлган иштаҳаси сусайгани ҳамда АҚШда меҳнат бозорига оид ижобий статистика эълон қилингани сабаб бўлди.
Мутахассисларнинг таъкидлашича, мазкур маълумотлар трейдерлар орасида АҚШ Федерал резерв тизими жорий йил охирига қадар асосий фоиз ставкасини яна ошириши мумкинлиги ҳақидаги кутилмаларни кучайтирган.
Натижада криптовалюта бозорида сотув босими ортиб, биткоин билан бир қаторда бошқа йирик рақамли активлар ҳам қиймат йўқотган.
