Биткоин нархи 4 ноябрь куни Binance криптобиржасида 100 минг доллардан пастга тушди. Бу ҳақда Meduza хабар берди.
Маълумотларга кўра, биткоин курси 99 600 долларгача пасайган, бу 23 июндан бери энг паст кўрсаткич ҳисобланади. Кейинчалик криптовалюта нархи бир неча бор 100 минг доллардан юқорига кўтарилган.
Криптоактивлар нархининг кескин пасайиши натижасида биткоин, Ethereum ва Solana каби криптовалюталарга сармоя киритган трейдерлар миллиардлаб доллар зарар кўрди. Cоингласс маълумотларига кўра, сўнгги 24 соат ичида мажбурий савдо ёпилишлари (ликвидациялар) ҳажми 1,4 миллиард долларга яқин бўлган.
Криптовалюталар курсининг тушиши фонида инвесторлар орасида “экстремал қўрқув” кайфияти кучайган. Alternative сервиси маълумотига кўра, криптобозорнинг “қўрқув индекси” 100 баллдан 21 баллгача пасайган. Бу октябрь ўрталаридан бери энг паст даражадир. Бу ҳолат бозордаги иштирокчилар жиддий хавотирда эканини ва криптовалюталарни оммавий сотиш тенденцияси кучайганини англатади.
- Прогнозлар
Ўтган ҳафта биткоин нархи 108 минг доллардан юқори бўлган пайтда Glassnode таҳлил компанияси криптовалютага талаб пастлиги сабабли нархларнинг янада тушиш хавфини қайд этганди. FxPro бозорининг бош таҳлилчиси Алекс Куптсикевич Coindesk нашрига шундай деди:
“Криптовалюта бозори маҳаллий тубдан чиқишга уринмоқда… Харидорлар тез орада курсларнинг янги кўтарилишига асос топишлари мумкин”.
Мутахассислар фикрича, ҳозирги пасайиш салбий сценарийга қайтишдан кўра, кўтарилиш тенденцияси доирасидаги қисқа муддатли барқарорлашув сифатида баҳоланмоқда.
“Биткоиннинг етти йил ичидаги биринчи ‘қизил октябри’ эътиборни тортди, бироқ мен буни тузилмавий ўзгаришдан кўра соғлом қайта тикланиш деб биламан. Жорий пасайиш глобал ўсиш тенденцияси доирасидаги консолидацияга ўхшайди — бу даврда узоқ муддатли эгалар активларни тўплашни давом эттирмоқда”, дейди SynFutures бош директори Рейчел Лин.
