Тошкент шаҳрининг Сергели туманида “Жунариқ” ва “Юқори Дархон” маҳаллаларини боғловчи янги кўприк фойдаланишга топширилди.
Аввал бу ҳудудда Жунариқ канали орқали хавфсиз ўтиш имконияти бўлмаган. Айрим аҳоли, жумладан, мактаб ўқувчилари йўлни қисқартириш учун канал устидаги қувурлардан фойдаланишга мажбур бўлган.
Мазкур муаммо 2026 йил март ойида Шавкат Мирзиёев томонидан танқид қилинганди. 13 март куни аҳоли мурожаатлари билан ишлаш тизими бўйича видеоселектор йиғилишида давлат раҳбари Сергелидаги бузилган кўприк бўйича фуқаронинг мурожаати икки ой давомида эътиборсиз қолдирилгани, масала фақат ижтимоий тармоқларда тарқалгач ҳал этилганини қайд этган.
Мустақилликнинг 35 йиллиги ва янги ўқув йили арафасида фойдаланишга топширилган янги кўприкнинг узунлиги 28 метр, кенглиги 8 метр. Мустаҳкам конструкция асосида қурилган иншоот 80 тоннагача юкни кўтариш имкониятига эга.
Кўприк орқали автотранспорт воситалари билан бирга пиёдалар, айниқса мактаб ўқувчиларининг канал орқали хавфсиз ва қулай ўтиши таъминланади. Натижада каналнинг икки томонида жойлашган маҳаллалар ва таълим муассасалари ўртасидаги қатнов учун хавфсиз йўл яратилди.
