Ғазо секторига инсонпарварлик ёрдами олиб кетаётган кемалар карвони (флотилия) ташкилотчилари 18 май куни баёнот берди. Уларнинг айтишича, Исроил кучлари Ўрта Ер денгизининг шарқий қисмида 10 та қайиқни қўлга олган. Шунингдек, жами 23 та кема билан алоқа йўқолган.
18 май куни эрталаб Исроил Ташқи ишлар вазирлиги X ижтимоий тармоғида баёнот берган эди. Унда Исроил Ғазонинг қонуний денгиз блокадаси бузилишига йўл қўймаслиги айтилган. Global Sumud Flotilla карвонига тегишли кемалар 14 май куни Туркия жанубидан учинчи марта йўлга чиққан эди. Бундан аввалги ёрдам етказишга уринишлар ҳам халқаро сувларда Исроил томонидан тўхтатилганди.
“Ҳозирги вақтда ҳарбий кемалар флотилиямизни тўсиб қўймоқда. Исроил кучлари кундуз куни биринчи қайиғимизга бостириб кирди. Биз қонуний ва зўравонликсиз гуманитар миссиямиз учун хавфсиз йўлак талаб қиламиз”, деб ёзди ташкилот ўзининг Хъдаги саҳифасида.
Гуруҳнинг билдиришича, Ғазодан тахминан 250 денгиз мили (463 километр) узоқликда 10 та кема тўхтатилган ва флотилиядаги 54 та кемадан 23 таси билан алоқа узилган. Тўхтатилган кемалар ичида йигирма нафардан ортиқ туркиялик борлиги маълум қилинди. Ушбу флотилияда дунёнинг 39 та мамлакатидан келган 426 киши иштирок этмоқда.
Исроил Ташқи ишлар вазирлиги эса ушбу “провокация”нинг барча иштирокчиларини зудлик билан йўналишни ўзгартиришга ва ортга қайтишга чақирди.
