Ливаннинг “Ҳизбуллоҳ” гуруҳи 2 мартга ўтар кечаси Исроилга ракеталар учирди, яҳудий давлати жавоб зарбалари йўллади. Бу ҳақда Al Arabiya хабар берди.
“Ҳизбуллоҳ” мазкур ҳужумларни Эрон олий раҳнамоси Оятуллоҳ Али Хоманаийнинг ўлими учун қасос деб атади.
Қаршилик ҳаракати раҳбарияти (“Ҳизбуллоҳ” раҳбарияти назарда тутилган)Исроил ҳужумлари давом этаётгани, етакчиларимиз, ёшларимиз ва халқимиз ўлдирилаётгани сабаб ўзимизни ҳимоя қилишимиз учун муносиб вақтда ва жойда жавоб қайтариш ҳуқуқини тақдим этган, дейилади гуруҳ баёнотида.
Исроил армияси бунга жавобан Ливан бўйлаб “Ҳизбуллоҳ” нишонларига, жумладан Байрутнинг жанубий чеккаларига зарбалар берди. “Ҳизбуллоҳ” Исроилга ҳужумни Али Хоманаийнинг “тоза қони учун қасос”, “Ливан ва унинг халқини ҳимоя қилиш” ҳамда “Исроилнинг такрорий ҳужумларига жавоб” сифатида амалга оширганини маълум қилди.
Ливандан учирилган снарядлар натижасида Исроил шимолидаги бир қанча ҳудудларда сиреналар янгради. Бу АҚШ ва Исроилнинг Эронга зарбалари бошланганидан бери Ливан ҳудудидан амалга оширилган илк ҳужум бўлди.
Ливан бош вазири Наваф Салом мамлакат жанубидан снарядлар учирилишини “масъулияцизлик” ва Ливан хавфсизлигига таҳдид солувчи “шубҳали ҳаракат” деб атади.
Исроил ва Ливан 2024-йилда АҚШ воситачилигида ўт очишни тўхтатишга келишиб олди, бу этомонлар ўртасида бир йилдан ортиқ давом этган жангларни якунлади. Мазкур ҳужумлар оқибатида “Ҳизбуллоҳ” раҳбари Ҳасан Насруллоҳ ҳалок бўлди.
Теҳроннинг Яқин Шарқдаги асосий иттифоқчиларидан бири ҳисобланган шиа мусулмон гуруҳи, яъни “Ҳизбуллоҳ” 28 февраль куни Эрон билан бирдамлигини билдирди. Бироқ можарога бевосита аралашиш-аралашмаслиги ҳақида аниқ баёнот бермаганди.
