“Ливерпуль” клуби испаниялик мутахассис Андони Ираолани бош мураббий этиб тайинланганини расман эълон қилди. Бу ҳақда клуб матбуот хизмати хабар берди.
Томонлар ўртасидаги шартнома шартлари ошкор қилинмаган.
43 ёшли Ираола 2024 йил ёзидан буён жамоани бошқариб келган нидерландиялик мураббий Арне Слотнинг ўрнини эгаллади. Слот қўл остидаги дебют мавсумида “Ливерпуль” Англия Премьер-лигаси чемпиони бўлган эди. Бироқ 2025-2026 йилги мавсумда жамоа АПЛда бешинчи ўринни эгаллади ҳамда Чемпионлар лигаси чорак финалида мусобақани тарк этди.
Андони Ираола 2023 йилдан буён Англиянинг “Борнмут” клубини бошқариб келаётган эди. У 2025-2026 йилги мавсум якунида жамоани тарк этди. Унинг раҳбарлиги остида “Борнмут” АПЛда олтинчи ўринни эгаллаб, клуб тарихида илк бор Европа лигаси асосий босқичига чиқди ва еврокубоклар йўлланмасини қўлга киритди.
Испаниялик мутахассис фаолияти давомида Кипрнинг АЕК клубини ҳам бошқарган бўлиб, у билан бирга Кипр Суперкубогини қўлга киритган. Шунингдек, у Испаниянинг “Мирандес” ва “Райо Вальекано” клубларида ҳам бош мураббий сифатида ишлаган.
