Тошкент туманидаги Навоий чегара божхона постидан синтетик наркотик олиб ўтмоқчи бўлганлар қўлга тушди. Бу ҳақда Давлат хавфсизлик хизмати хабар қилди.
Постга Қозоғистондан кириб келган, Тошкент шаҳрида яшовчи, 1989-йилда туғилган А.А. ҳамда Фарғона вилоятининг Боғдод туманида яшовчи, 1994- йилда туғилган М.А.га тегишли 2 дона редуктор текширилганда, унинг ичида 4 килограмм 965 грамм “Клефедрон” синтетик наркотик моддаси борлиги аниқланган.
Тезкор тадбир давомида Тошкент шаҳрида ушбу моддани қабул қилиб олган, уларнинг яна 3 нафар шериги ҳам қўлга олинди.
Маълум бўлишича, ушбу наркотик модда турли мессенжерлар орқали гиёҳвандлик воситалари савдоси билан шуғулланувчи Россия Федерацияси фуқароси томонидан юборилган.
Ҳозирда мазкур шахсларга нисбатан Жиноят кодексининг тегишли моддалари билан иш очилиб, тергов ҳаракатлари олиб борилмоқда.
Бундан ташқари, зангиоталик 1978- йилда туғилган фуқаро А.А.нинг яшаш хонадонидан 5 килограмм ҳамда Қибрай туманида истиқомат қилувчи, 1974-йилда туғилган Д.А.нинг уйидан 2 килограмм 326 грамм “Марихуана” гиёҳвандлик воситаси топилган.
Улар наркотик моддани яшаш хонадонларида етиштириб, келгусида сотиш мақсадида сақлаб келишган.
Ҳозирда ушбу шахсларга нисбатан ҳам жиноят иш қўзғатилиб, қамоқ эҳтиёт чораси қўлланган.
