Ички ишлар вазирлиги тизимида давлат харидларида 186 миллиард сўм бюджет маблағи ўзлаштирилгани аниқланди. Бу ҳақда президент Шавкат Мирзиёев раислигида ўтказилган йиғилишда маълум қилинди.
Президент раислигида ўтказилган йиғилишда маълум бўлишича, Абдуллаев ва Турсуновга нисбатан жиноят иши қўзғатилган.
“Билиб қўйинглар, давлатнинг ҳар бир сўми бўйича таъсирчан назорат ўрнатилади. Жавобгарлик муқаррар, жазо қаттиқ бўлади!”, – деди давлат раҳбари.
Шу боис, яқинда Администрация ва давлат идораларида комплаенс ва коррупцияга қарши ички назорат тизими йўлга қўйилгани таъкидланди. Қисқа муддатда бюджетга тушум, талон-торож, молиявий камчиликлар бўйича 53 триллион сўм ва ташқи савдо операцияда 8 миллиард доллардан ортиқ қарздорлик аниқлангани ўта аянчли ҳолат экани қайд этилди.
Давлат раҳбарига кўра, коррупциявий схемалар бўйича 4,2 триллион сўм зарар аниқланган, 1,3 триллион сўми ундирилган, 55 нафар шахс қамоққа олинган. Йиғилишда давлат идоралари ва корхоналарида хавфсизлик учун масъуллар фаолиятини ҳам танқидий қайта кўриб чиқиш вақти келгани қайд этилди.
“Бизга юқори касбий компетенсияларга эга, талабчан ёш раҳбарлар корпуси керак”, – деди президент.
Ҳуқуқ-тартибот тизимида хизмат ўташ чегараси полковниклар учун 55 ёш, генераллар учун 60 ёш бўлсада, ҳозир бу ёшдан ошган 300 дан ортиқ ходим раҳбарлик лавозимида ишлаётгани кўрсатиб ўтилди. Ваҳоланки, Фавқулодда вазиятлар вазирлиги тизимида раҳбар кадрларнинг барчасининг ёши 50 ёшдан кичик.
Раҳбарликка ёш кадрларни қўйиш, пенсия ёшидагиларнинг тажрибасидан мураббий ва ўқитувчи сифатида фойдаланиш ёки маҳаллада ёшларга устозлик қиладиган тизим яратиш муҳимлиги қайд этилди.
