Миллиардер Жефф Безосга тегишли Blue Origin компаниясининг New Glenn ракетаси учириш майдончасида портлаб кетди. Бу ҳақда The New York Times хабар берди.
Ҳодиса Флорида штатидаги учириш майдончасида маҳаллий вақт билан соат 21:00 ларда содир бўлган.
“Бугунги синов пайтида биз аномалияни бошдан кечирдик”, деб хабар берди Blue Origin ижтимоий тармоқларда.
Портлашдан кейинги ёнғин Кейп-Канаверал космик кучлари станциясидаги учириш майдончаси ва атрофдаги ускуналарга жиддий зарар етказган. Таъмирлаш ишлари камида бир неча ой давом этиши мумкин.
New Glenn ракетаси 322 фут (тахминан 98 метр) баландликда бўлиб, Ер орбитасига чиққан биринчи америкалик астронавт Жон Гленн шарафига номланган. Миллиардер Жефф Безоснинг айтишича, ҳозирда компания портлаш сабабларини аниқламоқда.
“Асосий сабабни билишга ҳали эрта, лекин биз аллақачон уни аниқлаш устида ишлаяпмиз. Жуда оғир кун бўлди, қайта қуриш керак бўлган ҳамма нарсани тиклаймиз ва парвозларга қайтамиз. Бунга арзийди”, деди Безос ижтимоий тармоқларда.
Reuters маълумотларига кўра, New Glenn’ни ишлаб чиқиш учун миллиардлаб доллар ва ўн йилга яқин вақт сарфланган. Ракета Amazon компаниясининг Leo интернет сунъий йўлдошлар туркумининг 48 та аппаратини коинотга олиб чиқиши керак эди. Портлаш вақтида Amazon сунъий йўлдошлари ракета бортида бўлмаган.
Муваффақиятсизлик НАСАнинг Ойга оид режаларига ҳам катта таъсир кўрсатади
Blue Origin — НАСА астронавтларини Ой юзасига олиб чиқадиган иккита компаниядан биридир, иккинчиси миллиардер Илон Маскнинг SpaceX компанияси ҳисобланади. Учириш майдончасига етказилган зарар туфайли Blue Origin келаси йили амалга оширилиши режалаштирилган “Артемида-3” миссиясида иштирок эта олмаслиги мумкин.
“Космик парвозлар хатоларни кечирмайди, янги оғир юк ташувчи ракетани ишлаб чиқиш фавқулодда мураккаб вазифадир. Биз ҳамкорларимиз билан ушбу аномалияни синчковлик билан ўрганишни қўллаб-қувватлаш, миссиянинг таъсирини баҳолаш ва ракеталарни қайта учириш устида ишлаймиз”, деди НАСА директори Жаред Айзекман X тармоғида.
