Ўзбекистонда алкоголь маҳсулотларининг ноқонуний айланмаси 35 фоиздан 18 фоизга, тамаки маҳсулотларида эса 19,6 фоиздан 9 фоизга пасайди. Бу ҳақда Иқтисодий жиноятларга қарши курашиш департаменти матбуот хизмати хабар қилди.
Маълум қилинишича, алкоголь ва тамаки билан боғлиқ 1 435 та қонунбузилиш ҳолати аниқланган бўлиб, уларда 885 минг дона алкоголь ва 912 минг қути тамаки маҳсулоти мусодара қилинган. Шунингдек, 15 та ишлаб чиқарувчи ва 29 та улгуржи корхонанинг лицензияси бекор қилиниб, 7 та корхонанинг тегишли рухсатномаси вақтинча тўхтатилган.
Бундан ташқари, алкоголь ва тамаки бозорини тартибга солиш инспексияси ташкил этилиб, соҳа бўйича 517 та мурожаат кўриб чиқилган ҳамда 97 та улгуржи савдо корхонаси рўйхатдан ўтган. 49 та субъектда электрон ҳисоблагичлар, 43 та корхонага видеокузатув воситалари ва 102 та транспорт GPS ускуналари билан жиҳозланган.
