Бугун, 25 февраль куни Ҳиндистон Бош вазири Нарендра Моди икки кунлик ташриф билан Исроилга борди. Бу АҚШ ва Эрон ўртасидаги зиддият кучайиб, минтақада эҳтимолий ҳарбий тўқнашув хавотири ортиб бораётган бир пайтга содир бўлди. Моди 2017 йилда Исроилга борган илк ҳинд бош вазири сифатида тарихга кирган эди. Бу ҳақда “Reuters” ёзди.
Моди ва Исроил Бош вазири Биньямин Нетаньяху бу гал сунъий интеллект, мудофаа ва технология соҳаларида ҳамкорликни чуқурлаштиришни муҳокама қилиши кутилмоқда. Исроил ҳарбий экспортни оширишга интилар экан, икки томонлама алоқаларни янги босқичга кўтариш нияти билдирилмоқда. Моди парламент – Кнессетда нутқ сўзлаши режалаштирилган.
Ташриф минтақадаги хавфсизлик вазияти билан узвий боғлиқ. АҚШ Эрон соҳиллари яқинига йирик денгиз кучларини жойлаштирган, эҳтимолий зарба сценарийси муҳокама қилинмоқда. Бундай вазиятда Теҳрон жавоб чоралари Исроилга ёки Форс кўрфази давлатларидаги Вашингтон объектларга қаратилган бўлиши мумкин. Бу эса ўша ҳудудларда меҳнат қилаётган миллионлаб Ҳиндистон фуқаролари ва мамлакат иқтисодиёти учун муҳим бўлган пул ўтказмаларига таъсир кўрсатиши эҳтимолини оширади.
Мутахассислар фикрича, Деҳли минтақада уруш чиқишини истамайди ва музокара йўлини қўллаб-қувватлайди. Шу билан бирга, Ҳиндистон Исроилдан ҳарбий техника харид қилишга қизиқса-да, ўзининг анъанавий мустақил ташқи сиёсат йўналишидан чекиниб, расмий ҳарбий иттифоққа қўшилишга эҳтиёткор ёндашади.
